July 2025
-
Kwa mara nyingine Mheshimiwa Rais Samia Suluhu Hassan ameendelea kudhihirisha namna anavyosikiliza na kuzipatika majawabu changamoto za wananchi wake, ambapo sasa Serikali imeweka zuio katika baadhi ya biashara kutofanywa na raia wa kigeni. Uamuzi huo umetokana na malalamiko ya wananchi juu ya uwepo wa raia wa kigeni kufanya kazi ambazo zingeweza kufanywa na wazawa. Kwa mujibu wa Amri ya Leseni za Biashara (Zuio la Shughuli za Kibiashara kwa wasio Raia), 2025, serikali imezuia wageni kufanya aina 15 za biashara, zikiwemo biashara ya bidhaa ya jumla na rejareja, isipokuwa supermarkets au maduka yanayouza kwa jumla kwajili ya wazawa. Biashara nyingine zilizozuiwa ni huduma ya uwakala wa fedha kwa simu, ufundi wa simu na bidhaa za kieleketroniki, uchimbaji mdogo, kuongoza watalii, huduma za posta na usafirishaji vipeto, uanzisha na uendeshaji wa redio na televisheni, uendeshaji wa maeneo ya makumbusho pamoja na udalali. Aidha, wamezuiwa kufanya biashara ya huduma za forodha na usafirishaji, ununuzi wa mazao shambani, umiliki na uendeshaji wa mashine za kamari isipokuwa ndani ya viunga vya casino pamoja na umiliki na uendeshaji wa viwanda vya chini na vidogo. Kumekuwa na malalamiko ya wananchi kuwa raia wa kigeni, hasa wa China wanafanya biashara za wazawa ikiwemo uuzaji wa nguo Kariakoo, udalali wa nyumba pamoja na uwakala wa fedha. Hatua hii ni mwendelezo wa Mheshimiwa Rais kukabiliana na changamoto ya ajira nchini, hasa kwa vijana, ambapo pia serikali yake imeendelea kutoa mikopo, kupanua fursa za elimu ya ufundi stadi, kuwapatia elimu ya kilimo-biashara pamoja na kufungua fursa za masoko ndani na nje ya nchi. Uamuzi huu umepongezwa na wananchi, hasa kwenye mitandao ya kijamii, ambapo wengi wamempongeza Mheshimiwa Rais kuwa amesikia na kujibu kilio chao cha muda mrefu. Read More
-
Tanzania imeongoza Afrika Mashariki kwa kasi kubwa ya ongezeko la thamani ya uwekezaji kutoka nje ya nchi ambapo imeongezeka kwa asilimia 28.3 kutoka dola za Marekanili bilioni 1.34 (TZS trilioni 3.5) mwaka 2023 hadi kufikia dola za Marekani bilioni 1.72 (TZS trilioni 4.4) mwaka 2024. Aidha, kasi hiyo kubwa ya ongezeko la uwekezaji imeifanya Tanzania kushika namba 11 Afrika kwa kiwango kikubwa cha uwekezaji toka nje, na nafasi ya 13 kwa ukuaji wa thamani ya uwekezaji. Pia, umeiwezesha Tanzania kuvuka kiwango cha asilimia 12 cha ukuaji wa uwekezaji kilichowekwa kwa nchi za Afrika Mashariki na bara la Afrika. Ukuaji huo ni matokeo ya kazi kubwa ya Serikali ya Awamu ya Sita ikiongozwa na Mheshimiwa Rais Samia Suluhu Hassan ambapo ameendelea kuboresha mazingira ya biashara na uwekezaji nchini, kuimarisha ushirikiano na sekta binafsi pamoja na kutangaza fursa zilizopo kimataifa na hivyo kupelekea kuongeza kwa miradi ya uwekezaji. Mwaka 2024 Tanzania iliweka rekodi kwa kusajili miradi 901 ya uwekezaji kutoka miradi 526 mwaka 2023 ambapo maelfu ya wananchi watanufaika na ajira, na miradi hii itachagiza ukuaji wa sekta nyingine kama nishati, maji, mawasiliano, usafirisha, huduma na uzalishaji. Read More
-
Soma na pakua hapa Dira ya Taifa ya Maendeleo 2050. Dira hii ya pili isiyofungama na chama cha kisiasa kwa nchi yetu ni matokeo ya maoni ya wananchi ambapo sehemu kubwa ya waliotoa maoni ni vijana. Read More
-
Kwa mara ya pili katika historia ya Tanzania, tumeandika na kuzindua Dira ya Taifa ya Maendeleo ya miaka 25 (2025-2050) ambayo haifungamani na chama cha kisiasa ambapo Mheshimiwa Rais Dkt. Samia Suluhu Hassan ameweka historia ya kuwa Rais wa pili kufanya hivyo, baada ya Hayati Benjamin Mkapa aliyeandika Dira 2025 (2000-2025). Dira hiyo ambayo ni maoni ya wananchi, hasa vijana, inaanzisha safari ya mabadiliko makubwa, ili ifikapo katikati ya karne ya 21 (mwaka 2050) Tanzania iwe nchi yenye ustawi, usawa na uwezo wa kujitegemea. Msingi wa dira hiyo ni maendeleo ya watu yanayochochewa na uchumi imara, wenye ushindani na kipato cha juu, ili kuinua viwango vya maisha ya wananchi na kuondoa umasikini. Akizungumza wakati wa uzinduzi wa dira jijini Dodoma, Mheshimiwa Rais Samia amesema kuwa baada ya kuandikwa na kuzinduliwa, hatua inayofuata sasa ni utekelezaji na kwamba ipo haja ya kufanya mabadiliko ya kifikra, kimtazamo na kimatendo ili kufanikisha malengo yaliyowekwa. Pia, amewasihi wananchi kufanya kazi kwa bidii, ari na nguvu, huku akibainisha kuwa sekta binafsi itapewa nafasi kubwa katika kufanikisha malengo na shahaba tuliyojiwekea. “Kutokana na uzoefu tulioupata katika utekelezaji wa mipango ya maendeleo ya muda mrefu, tumedhamiria sasa kuitekeleza Dira 2050 kwa umakini mkubwa,” ameeleza Mheshimiwa Rais huku akiwahakikisha wananchi kuwa utekelezaji wa dira hiyo utafanikiwa. Dira hiyo imechagua sekta tisa za mkazo ambazo ni kilimo, viwanda, ujenzi, madini, utalii, uchumi wa buluu, huduma za kijamii, huduma za kifedha na michezo na ubunifu. Sekta hizo zimepewa kipaumbele kutokana na uwezo wake wa kuzalisha ajira, kuongeza mapato ya Serikali na kuchochea ukuaji wa sekta nyingine. Baadhi ya malengo mahsusi ya dira ni kuwa nchi yenye kipato cha kati ngazi ya juu, ikiwa na pato la taifa la dola za Marekani trilioni moja, na wastani wa pato la mtu mmoja la dola za Marekani 7,000 kwa mwaka. Read More
-
Sekta ya Utalii nchini imeipita dhahabu kwa kuwa ya kwanza katika kuingiza fedha za kigeni nchini, ambapo mapato yake kwa mwaka ulioishia Mei 2025 yamefikia dola za Marekani bilioni 3.92 (TZS trilioni 10.2), ikiwa ni asilimia 55 ya mapato yote ya mauzo ya nje. Kiwango hicho ni ongezeko kutoka dola za Marekani bilioni 3.63 kwa kipindi kama hicho mwaka jana. Ongezeko hilo limeipita dhahabu ambayo imeingiza dola za Marekani bilioni 3.83 (TZS trilioni 9.9), na hivyo kuthibitisha ukuaji madhubuti wa sekta ya utalii na mchango wake katika uchumi wa nchi. Mafanikio haya ni matokeo ya hatua zinazoendelea kuchukuliwa na serikali ya awamu ya sita chini ya Mheshimiwa Rais Samia Suluhu Hassan akitambua umuhimu wa sekta hii katika uchumi wetu ambayo inachangia asilimia 17.2 katika Pato ghafi la Taifa, inachangia asilimia 25 ya mapato ya fedha za kigeni na kuajiri zaidi ya milioni 3. Moja ya hatua iliyochukuliwa ni Julai 8 mwaka huu ambapo Benki Kuu ya Tanzania (BoT) iliruhusu kampuni za utalii kutumia fedha za kigeni katika maeneo mawili muhimu: wakati wa kulipia bidhaa na huduma kwa niaba ya watalii wasiokuwa wakazi, na wakati wa kununua magari maalum ya utalii kutoka kwa wasambazaji wa ndani. Uamuzi huo ulipokelewa kwa furaha na Chama cha Waendeshaji wa Utalii Tanzania (TATO) kikieleza kuwa serikali imedhamiria kukuza sekta hiyo yenye mnyororo mrefu wa thamani na kwamba wataendelea kushirikiana nayo ili kuikuza zaidi sekta hiyo. Read More
-
Kazi ya Mheshimiwa Rais Samia Suluhu Hassan kuwatumikia Watanzania na kuchochea mageuzi kwenye kila sekta inaendelea kutambuliwa ndani na nje ya nchi ambapo leo amepokea Tuzo ya Wanawake 100 wenye Nguvu Afrika (The Power of 100 Africa Women Award) kutoka Access Bank Group. Tuzo hiyo ina malengo makuu matatu ambayo ni kutambua na kusherehekea wanawake wa Kiafrika wanaotoa michango ya mageuzi kwa mataifa na jamii zao, kuhamasisha na kuhimiza kizazi kijacho cha viongozi Wanawake katika bara zima la Afrika na kupaza sauti za Wanawake katika kuleta maendeleo endelevu ya kiuchumi na kijamii barani Afrika. “Mheshimiwa Raisi, leo hii, tunaungana na Waafrika wote kukukabidhi tuzo hii maalumu […] kama kiongozi wa kuigwa ambaye utawala wake shirikishi, mageuzi ya kiuchumi, na utetezi wa jinsia unaendelea kuinua mamilioni ya watu, siyo tu nchini Tanzania, bali barani Afrika na duniani kwa ujumla,” amesema Mwenyekiti wa Bodi ya Wakurugenzi ya Access Bank Group, Protase Ishengoma. Mageuzi ambayo Mheshimiwa Rais ameyafanya nchini yameongeza idadi ya wanawake katika nafasi za uongozi, yamechochea kuimarika kwa biashara na kuvutia uwekezaji, yameboresha huduma za kijamii (afya, maji, elimu), kuimarisha amani, utulivu na demokrasia nchini, pamoja na kuongeza uwezo wa serikali kutekeleza miradi ya kimkakati ambayo inaboresha maisha ya wananchi. Read More
-
Kazi ya Amiri Jeshi Mkuu, Mheshimiwa Rais Samia Suluhu Hassan kuendelea kulinda amani ya nchi yetu imeendelea kutuletea matunda na heshima ambapo Tanzania imetajwa kuwa nchi yenye amani zaidi Afrika Mashariki kwa mujibu wa ripoti ya Global Peace Index ya mwaka 2025. Amani ni msingi wa maendeleo yoyote ambayo jamii au taifa linalenga kuyafikia iwe kiuchumi, kijamii na kisiasa. Tanzania kutajwa miongoni mwa nchi zenye amani zaidi kunaendelea kuitangaza sifa njema kimataifa na hivyo kuifanya kuaminia na kuvutia biashara, uwekezaji na watalii zaidi, hivyo kuchochea ukuaji wa uchumi. Akitoa hotuba ya kuhitimisha shunguli za Bunge la 12 la Jamhuri ya Muungano wa Tanzania, Mheshimiwa Rais alisema nchi pamoja na wananchi wake wapo salama kutokana na kazi kubwa inayofanywa na vyombo vya dola. Aidha, uimara huo umetokana na serikali kuvipatia vifaa vya kisasa, mafunzo, kuboresha maslahi pamoja na kuajiri watumishi wapya hivyo kuviongezea uwezo wa kutekeleza majukumu yake. Ripoti hiyo ambayo imehusisha nchi 163 duniani imetumia vigezo 23 kupima amani ya nchi ikiwemo ulinzi na usalama wa jamii na kiwango cha migogoro ya kitaifa na kimataifa na matumizi. Tanzania imeshika nafasi ya kwanza ikiwafuatiwa na Rwanda, Uganda, Kenya, Burundi, Somali, Jamhuri ya Kidemokrasia ya Congo na Sudan Kusini. Read More
-
Mwaka 2024/25 umekuwa mwaka wa rekodi kwenye ukusanyaji wa mapato nchini, ukusanyaji wa mapato wa TZS shilingi 32.26, sawa na ufanisi wa asilimia 103.9, umeiwezesha Serikali ya Awamu ya Sita kuweka rekodi kubwa nne. Rekodi zilizoweka ni kuvuka kwa lengo la mwaka la makusanyo ya kodi kwa mara ya kwanza tangu mwaka 2015/16. Rekodi ya pili ni kuvuka lengo la makusanyo ya kila mwezi kwa miezi 12 mfululizo kwa mara ya kwanza tangu kuanzishwa kwa Mamlaka ya Mapato Tanzania (TRA) mwaka 1996. Rekodi ya tatu ni kuongezeka kwa wastani wa makusanyo ya kila mwezi hadi shilingi trilioni 2.69, ambacho ni kiwango cha juu zaidi katika historia ya TRA. Aidha, rekodi ya nne ni kufanikisha makusanyo ya juu zaidi kwa mwezi mmoja ambapo shilingi trilioni 3.58 zilikusanywa Desemba 2024. Matokeo haya yamechangiwa na kazi kubwa iliyofanywa na Mheshimiwa Rais Samia Suluhu Hassan ya kuboresha mazingira ya biashara na uwekezaji nchini. Miongoni mwa aliyofanya ni kurekebisha sheria na kanuni 66 pamoja na kufuta au kupunguza kodi, ada na tozo 383 ili kuondoa adha kwa wafanyabiashara. Hatua hizo zimeongeza ushirikiano mzuri kati ya TRA na walipakodi jambo ambalo limeongeza utayari wa wananchi kulipa kodi, kukua kwa shughuli za biashara na uwekezaji, kuimarika kwa ufanisi wa TRA katika kushughulikia masuala ya wateja, hasa kutokana na mamlaka hiyo kuongezewa watumishi. Read More